Kreu i LZHK, Dashamir Shehi kërkoi nga autoritetet kompentente që të marrin masë për të pezulluar përdorimin e vaksinës AstraZeneca, njësoj si shumë vende të tjera.
Përmes një postimi në “Facebook”, Shehi deklaroi se njerëzit kanë frikë për shkak të mungesës së informacionit dhe po kundërshtojnë marrjen e vaksinës.
“Shqipëria të ndalë përdorimin e vaksinës AstraZeneca! Letonia dhe Suedia janë dy vendet e fundit që këtë martë kanë vendosur të pezullojnë përdorimin e vaksinës AstraZeneca, deri në një vendim të autoriteteve evropiane që po analizojnë të dhënat e sigurisë së saj. Më herët përdorimin e vaksinës për shtetasit e tyre e kanë ndaluar Gjermania, Franca, Italia dhe vende të tjera evropiane pas njoftimeve për efekte të mundshme anësore. Përballë kësaj situate i bëj thirrje qeverisë shqiptarë të ndalojë përdorimin e kësaj vaksinë, deri sa autoritetet e specializuara të konfirmojnë se ajo nuk ka efekte anësore. Refuzimi në masë i arsimtarëve për të kryer këtë vaksinë është tregues i qartë i frikës që kanë njerëzit për shkak të mungesës së informacioneve për këtë vaksinë. Ndërkohë Rama duhet t’i japë fund shfaqjes butaforike të pritjes së vaksinës me delegacion qeveritar në aeroport, shfaqje që nuk ndodh as në vend e botës së tretë”, thekson Shehi.
