Policia e Tiranës ka finalizuar operacionin e koduar “Drejtimi”, duke parandaluar tentativën për trafikimin e një sasie të konsiderueshme lëndësh narkotike. Në pranga kanë rënë Mirand Herri, 51 vjeç, dhe Luftim Hoxha, 41 vjeç, të dy banues në Maminas, Durrës.
Gazetari i Vizion Plus, Esido Barkaj, raporton se dy personat ishin mbajtur prej disa ditësh nën vëzhgim, pas informacioneve se do të transportonin drogë në zonën e “Treshit”, pranë Nishtulla 3, në drejtim të Durrësit. Efektivët e antidrogës lokalizuan automjetin “Mercedes-Benz” në rrugën “Kastriotët” dhe kryen kontrollin e tij.
Gjatë kontrollit, në automjet u gjet një çantë me shtatë pako me lëndë të dyshuar narkotike. Katër prej pakove përmbanin heroinë, me peshë 2 kilogramë e 123.6 gramë, ndërsa tre të tjera kokainë, me peshë 3 kilogramë e 120.6 gramë. Në total, u sekuestruan 5 kilogramë e 244.2 gramë lëndë narkotike.
Sipas të dhënave të bëra publike, nëse kjo sasi do të hidhej në treg dhe do të shpërndahej në doza, vlera e saj do të kapte mbi 500 mijë euro. Policia e ka cilësuar sekuestrimin si një nga sasitë më të mëdha të drogave të forta të kapura gjatë kohëve të fundit në kryeqytet. Dy të arrestuarit janë dërguar për veprime të mëtejshme procedurale, ndërsa hetimet vijojnë në bashkëpunim me Prokurorinë për identifikimin e personave të tjerë të përfshirë.
Në një tjetër rast të bërë publik nga drejtori i DVP Tiranë, Oliger Torba, policia ka parandaluar edhe një konflikt të mundshëm mes rreth 28 të miturve, të moshave 13 deri në 17 vjeç, të dyshuar se do të përfshiheshin në një përplasje me armë të ftohta. Pas rreth 72 orësh verifikime në rrjetet sociale dhe punës së strukturave të Hetimit të Krimit Kibernetik, policia ndërhyri përpara se situata të përshkallëzohej. Torba u bëri thirrje prindërve të bashkëpunojnë me policinë dhe të raportojnë çdo rast të dyshimtë që mund të rrezikojë sigurinë e fëmijëve.
/vizionplus.tv
