Kryeministri Edi Rama, pas takimit me ministrat ditën e sotme në Pogradec, i cili zgjati 7 orë, u është drejtuar qytetarëve përmes një komunikimi në rrjetet sociale.
Në fjalën e tij, Rama tha se janë konsoliduar disa prej pozicioneve të qeverisë, veçanërisht në raportin mes qytetarit dhe shtetit, si dhe në funksionimin e shumicës parlamentare.
“Kemi përgatitur shumëçka tani, duke i dhënë dorën e fundit, pasi kemi punuar intensivisht edhe si reflektim i thelluar i asaj që nisi përpara se pushimet të ndërprisnin punën intensive të ditës. Kemi konsoliduar disa pozicione, qoftë lidhur me raportin qytetar-shtet dhe shtet-qytetar”, tha Rama.
Më tej, Rama u ndal edhe te qëndrimi i Partisë Socialiste në territor, si dhe te programet e reja të qeverisë.
Në qendër të fjalës së Ramës ishte edhe koncepti “BESA”, të cilin ai e cilësoi si një parim të konsoliduar në themel të qasjes së re të qeverisë.
“BESA është një koncept i konsoliduar në themel të pozicionit të parë. BESËN e shohim si një akronim dhe jo thjesht si fjalën më të vyer të thesarit të kulturës dhe historisë shqiptare. Do të thotë besim, empati, shërbim dhe angazhim”, u shpreh kryeministri.
