Kryeministri izraelit Benjamin Netanyahu ka deklaruar në një video se ka urdhëruar ushtrinë izraelite të vazhdojë forcimin e të ashtuquajturës “zonë e sigurisë” në Libanin e Jugut.
Sipas Reuters, Netanyahu tha se forcat izraelite po vazhdojnë operacionet ushtarake kundër Hezbollahut dhe se janë “në prag të marrjes së kontrollit të Bint Jbeil”, një nga qytetet kryesore në zonën kufitare.
Ai nuk sqaroi nëse deklarata është bërë para apo pas një mbledhjeje të kabinetit të sigurisë izraelite, ku pritet të diskutohet mundësia e një armëpushimi të afërt në Liban, nën presionin e Shteteve të Bashkuara.
Në deklaratën e tij, Netanyahu theksoi se një nga objektivat kryesore të operacioneve është “shkatërrimi i Hezbollahut”, duke e lidhur këtë me negociatat që po zhvillohen për situatën në Liban. Sipas tij, qëllimi i këtyre bisedimeve është arritja e një “drejtimi të ri të sigurisë” dhe një “paqeje afatgjatë të bazuar në forcë”.
Ai gjithashtu përmendi koordinimin me Shtetet e Bashkuara, duke thënë se aleatët amerikanë janë të informuar vazhdimisht për kontaktet me Iranin dhe se objektivat strategjikë mes dy vendeve janë të njëjta. Netanyahu shtoi se Izraeli është i përgatitur për çdo skenar, përfshirë mundësinë e rifillimit të përplasjeve me Iranin.
Ndërkohë, sipas raportimeve të mediave izraelite, ushtria izraelite ka përcaktuar tre kushte kryesore për një marrëveshje të mundshme me Libanin. Ato përfshijnë krijimin e një zone tampon në jug të lumit Litani, pa praninë e Hezbollahut dhe infrastrukturës së tij; ruajtjen e lirisë së plotë të veprimit ushtarak në territorin libanez për të goditur kërcënimet; dhe nisjen e një procesi afatgjatë për çarmatimin e Hezbollahut, nën një mekanizëm mbikëqyrjeje ndërkombëtare, kryesisht amerikane.
Sipas këtyre raportimeve, një tjetër skenar i diskutuar është ndarja e Libanit në zona të ndryshme sigurie, ku jugu do të shërbente si zonë tampon, ndërsa zonat më në veri do të kishin rol të ndryshëm në kontrollin dhe çarmatimin e forcave të Hezbollahut.
Megjithatë, deri tani nuk ka pasur konfirmim zyrtar se ushtria izraelite ka marrë urdhra për përgatitjen e një armëpushimi, duke treguar se situata mbetet e tensionuar dhe e pasigurt në kufirin libano-izraelit.
