Vetëm gjashtë muaj më parë, retorika e ashpër mes presidentit të shteteve te bashkuara dhe liderit të Koresë së Veriut, u mendua se do ta çonte botën drejt një lufte të re. Donald Trump e Kim Jong Un kërcënonin njëri tjetrin me lancimin e raketave ndërkontinentale, të cilat nëse do të ishin shkëputur nga toka, mund të sillnin pasoja katastrofike.
Me gjithë “garën” se kush e ka butonin bërthamor më të madh, sot Trump dhe Kim Jong Un ndodhen në Singapor, në pritje të samitit të shumëpritur të 12 qershorit.
Sytë e rajonit, Kinës dhe Koresë së Jugut, janë drejtuar nga Singapori. A do arrijë Trump një marrëveshje dhe ta binde Kim Jong Un të heqë dorë nga program i tij bërthamor?
Çdo gjë është në tryezë, madje, duke parë që SHBA-të kanë një president të paparashikueshëm, mund të ndodhë që Trump ta braktisë takimin nëse nuk arrin një marrëveshje. Vetëm 2 ditë më parë ai u largua nga samiti I 7 vendeve më të industrializuara të botës, për shkak se nuk arriti të gjente një rrugë të mesme mbi tregtinë me BE-në pas tarifave të reja që vetë ai i ka vendosur në kuadër të planit të tij “Amerika e Para”.
Delegacioni i SHBA ndërkohë është takuar me përfaqësuesit e Kim Jong Un në Singapor, vetëm disa orë para takimit të shumëpritur. Mediat nuk kane mundur te mësojnë shumë detaje nga bisedimet e mbajtura mes delegacioneve.
Trump do të takohet me Kim Jong Un në orën 09:00 të martën në Hotel Capella në Sentosa Island të Singaporit. Siguria është në nivelin e saj më të lartë. Singapori ka investuar 10 milionë dollarë, për ta garantuar sigurinë gjatë samitit mes dy udhëheqësve. Madje qeveria ka evakuuar edhe zonat e afërta pranë hotelit ku do të mbahet takimi historik, ndërsa të gjithë vizitorët do t’i nënshtrohen kontrolleve të rrepta.
