Një zbulim me rëndësi të veçantë historike është bërë në ujërat e Detit Jon, pranë Prevezës në Greqi, ku është gjetur pothuajse e paprekur anija luftarake gjermane LS 6 (Leichte Schnellboot 6), e fundosur gjatë Luftës së Dytë Botërore.
Sipas mediave greke, mjeti ndodhet në një thellësi prej 96 metrash dhe konsiderohet i vetmi i këtij lloji që ka mbijetuar deri më sot në nivel botëror.
Zbulimi u bë pas një kërkimi shumëvjeçar dhe zhytjesh teknike, të bazuara në dokumentet e arkivave ushtarake gjermane që tregonin vendndodhjen ku ishte fundosur në shtator të vitit 1943.
Zhytësit e gjetën mjetin pothuajse në pozicion vertikal mbi fundin ranor të detit, me një pjesë të madhe të strukturës së tij të ruajtur në gjendje të shkëlqyer, pavarësisht dekadave të kaluara nën ujë.
Sipas ekipit kërkimor, kërkimet nisën në vitin 2013, pasi studiuesi Peter Schenk siguroi të dhënat e para për një anije të vogël të tipit Leichte Schnellboot, e cila besohej se ishte fundosur mes Lefkadës dhe Prevezës. Më pas, historiani Giorgos Karelasi grumbulloi dokumentacionin dhe koordinoi operacionin që çoi në zbulimin e saj.
LS 6 ishte transportuar në Greqi së bashku me anijen LS 5, për t’u përdorur nga marina ushtarake gjermane Kriegsmarine në operacionet detare në Egje pas kapitullimit të Italisë.
Gjatë misioneve pësoi dëmtime të rënda nga një sulm ajror britanik në Igumenicë.
Ekspertët vlerësojnë se zbulimi i LS 6 përbën një ngjarje të rëndësishme për studimet historike dhe arkeologjinë nënujore, pasi ofron të dhëna të rralla mbi një kategori anijesh luftarake gjermane, nga të cilat nuk njihej asnjë ekzemplar tjetër i ruajtur deri më sot.
