Irani dhe Omani kanë arritur një marrëveshje për përcaktimin e koordinatave gjeografike të rrugës së lundrimit në Ngushticën e Hormuzit, ndërsa së shpejti pritet të publikojnë edhe një deklaratë të përbashkët.
Lajmin e konfirmoi të mërkurën zëdhënësi i Ministrisë së Jashtme të Iranit, Esmail Baghaei, i cili theksoi se kjo marrëveshje, megjithëse përbën një hap të rëndësishëm, nuk mjafton për të garantuar sigurinë në një nga korridoret detare më të rëndësishme në botë.
Sipas Baghaeit, çdo ndërhyrje ushtarake e Shteteve të Bashkuara në rajon mund të destabilizojë situatën dhe të cenojë sigurinë në Ngushticën e Hormuzit.
Ai kritikoi gjithashtu politikat e Uashingtonit ndaj Iranit, duke përmendur bllokadën detare të shpallur nga SHBA-ja dhe veprime të tjera që, sipas tij, janë kërcënuese për interesat iraniane.
Njoftimi vjen vetëm pak orë pasi Reuters raportoi se në kuadër të negociatave mes Iranit dhe Omanit po diskutohet një marrëveshje që do t’i japë Iranit një rol në mbikëqyrjen e anijeve që hyjnë në Gjirin Persik përmes Ngushticës së Hormuzit.
Megjithatë, burimet theksuan se bisedimet nuk kanë përfunduar ende dhe se mbeten disa çështje të rëndësishme për t’u dakordësuar. Ato hodhën poshtë gjithashtu vlerësimet e presidentit amerikan Donald Trump se një marrëveshje për funksionimin normal të ngushticës është e afërt.
“Është arritur tashmë një mirëkuptim për një formë të caktuar kontrolli në Ngushticën e Hormuzit”, deklaroi një nga burimet rajonale për Reuters, duke shtuar se detajet përfundimtare të marrëveshjes vijojnë të jenë objekt negociatash.
