Një shitës perimesh në qytetin Kherson të Ukrainës i ka mbijetuar sulmit nga një dron gjatë kohës që po përgatiste stendën e tij në treg. Pamjet e publikuara nga policia ukrainase tregojnë dronin duke e ndjekur 52-vjeçarin rreth automjetit të tij, përpara se të shpërthente. Burri pësoi plagë nga copëzat e predhës dhe u dërgua në spital.
52-vjeçari, i identifikuar vetëm si Yurii, tregoi se gjithçka ndodhi pak çaste pasi kishte mbërritur në treg së bashku me bashkëshorten. “Sapo kisha vendosur çadrën dhe kisha nisur të shkarkoja kutitë. Gruaja ime ishte me mua. Dëgjuam një zhurmë, por nuk e shihnim dot dronin. Ai erdhi nga pas tregut dhe fluturonte shumë ulët”, rrëfeu ai nga shtrati i spitalit.
Lexo edhe :
Duke përshkruar frikën e atyre momenteve, Yurii tha se nuk kishte ku të strehohej. “Është një zonë e hapur, nuk ka ku të fshihesh. Ishte e tmerrshme, vërtet e tmerrshme”, u shpreh ai, ndërsa tregoi plagët që kishte marrë në të dyja këmbët dhe në shpinë. Bashkëshortja e tij arriti të largohej me vrap dhe nuk u lëndua.
🇷🇺⚔️🇺🇦 — Russian FPV drone operators in Kherson deliberately hunted a civilian vegetable vendor on the morning of August 4.
Video released by Ukraine’s National Police shows the drone circling a market stall and pursuing the man, identified as 52-year-old Yuriy from Mykolaiv… pic.twitter.com/Hbki1UJDAI
— 🔥🗞The Informant (@theinformant_x) August 4, 2026
Presidenti ukrainas Volodymyr Zelensky e dënoi incidentin, duke e cilësuar si pjesë të një fushate terrori ndaj civilëve. Sipas tij, pamjet tregojnë një “gjueti” ndaj njerëzve të pafajshëm dhe kërkoi rritjen e presionit ndërkombëtar ndaj Rusisë.
Nga ana tjetër, Ministria e Jashtme e Ukrainës e cilësoi sulmin një krim lufte, ndërsa autoritetet ruse kanë mohuar vazhdimisht se synojnë civilët. Edhe Moska ka akuzuar Ukrainën për sulme ndaj zonave civile në territorin rus, ndërsa të dyja palët vazhdojnë të hedhin poshtë pretendimet e njëra-tjetrës për shënjestrim të qëllimshëm të civilëve.
/vizionplus.tv
