I ftuar në Spotlight nga Alban Dudushi, në Vizion Plus, analisti i njohur, Mentor Nazarko, është shprehur se dinamika që prodhoi Trump favorizoi shqiptarët e Kosovës. Ai është ndalur në 3 qasje kryesore për dialogun Kosovë-Serbi prej ku thotë se BE tashmë nuk ka prodhuar asgjë të ngjashme me marrëveshjen e Shtatorit të 2020-ës.
“Asaj piste të re që hapi presidenti Trump, sa i takon dialogut Kosovë-Serbi që është pjesa më e rëndësishmë që i intereson kombit shqiptar, vendosi gjurmën e vet duke favorizuar Kosovën.
I mbahem pikëpamjes që ishte Trump , që në qoftë se ka patur 3 qasje kryesore sa i takon dialogut Kosovë-Serbi të cilat janë:
- Dialogun e menaxhon Evropa dhe Amerika e mbështet si e jashtme, pastaj për të përfunduar tek Këshilli i Sigurimit;
- Mund të bëhet një konferencë ndërkombëtare, e ngjashme me Rambujenë, ku do të përfshiheshin edhe rusët tani, në mënyrë të tillë që, pastaj rezoluta e re që do të pranonte Kosovën në Këshill të Sigurimit të ishte në konsënsus paraprak.
- Varianti i Trump-it, vetëm Amerika do ta zgjidhë këtë, që u sabotua intensivisht, më së pari nga vetë shqiptarët, qeveritë e Kosovës, në fillim nga z.Haradinaj, pastaj nga z.Kurti, pastaj nga vetë evropianët të cilët unë mendoj që kanë nga pak dorë në këtë që ndodhi në publikimin e akuzës së z.Thaçi.
Diçka që e shtyu pafund dialogun, sepse thirrja e Trumpit që dialogu Kosovë-Serbi të zhvillohet nën egidën amerikane është e Dhjetorit të 2018-ës. Dialog nën drejtimin amerikan që do të përfundonte në mënyrë reciproke. Është më 20 Dhjetor të vitit 2018. Prej atëherë kanë kaluar 2 vjet dhe BE që pretendonte autorësi mbi këtë dialog nuk prodhoi asgjë të ngjashme me atë marrëveshje të Shtatorit të 2020-ës.”
