Kosova është përfshirë nga ethet e garës elektorale. Mbetet më pak se një muaj nga zgjedhjet e jashtëzakonshme të 14 shkurtit dhe partitë kanë regjistruar tashmë kandidatët në Komisionin Qendror të Zgjedhjeve.
Analisti Nexhemdin Spahiu analizoi për “Vizion Plus” situatën momentale në Kosovë, duke nxjerrë në pah dy bashkëpunime mes partive kryesore.
“Në Kosovë do të garojnë 4 parti, de facto. Gara në Kosovë po thjeshtëzohet gjihmonë e më shumë. Vërehet një bashkëpunim i heshtur mes LDK dhe PDK. Të dyja kanë interes që të mos dëmtohen. Është dhe një alenacë mes LVV dhe AAK, që po ashtu ju intereson një gjë, sidomos aleancës, që LVV të mos fitojë aq shumë sa të vendosë e vetme presidentin. Por edhe të mos jetë aq poshtë, sa të detyrohet të bëjë koalicion me LDK apo PDK. Është një garë shumë interesante. Mbetet të shihet në vijim, ka edhe një muaj deri tek zgjedhjet. Duket çdo gjë normale dhe më e emancipuar gara sesa zgjedhjet e kaluara.”
Nëse zgjedhjet mbahen sot, sipas tij, Albin Kurti dhe Vjosa Osmani mund të marrin 48 deputetë. Kjo do t’u hapte rrugën, shtoi Spahiu që të bëjnë lehtë koalicion me AAK për të formuar qeverinë. Ai komentoi edhe mungesën e Isa Mustafës në listën e kandidatëve.
“Ai ka humbur të gjitha zgjedhjet dhe ka një urrejtje të paparë në mesin e votuesve të LDK ndaj tij dhe ata e dinë që votuesit do ta shprehnin këtë. Prandaj ai nuk ka dalë fare në disa zgjedhje si kandidat. Për këtë situatë, ai ka bërë zgjedhjen më të mençur. Avdullah Hoti është më i pranueshëm për elektoratin.”
