Pas vendimit për të shtyrë vitin e ardhshëm zhvillimin e konferencës ndërqeveritare që zyrtarizon nisjen e negociatave për anëtarësim e Shqipërisë dhe Maqedonisë së Veriut në Bashkimin Evropian, Italia, si në çdo rast tjetër premton përpjekje maksimale që ajo të zhvillohet sa më shpejt.
Qëndrimin e vendit fqinj e ripërsëriti, këtë herë edhe në gjuhën shqipe, Luigi Di Maio, ministri i Jashtëm i Italisë, në vizitën që pati në Tiranë.
LUIGI DI MAIO
MINISTER I JASHTEM I ITALISE
“Italia ka qenë gjithmonë pranë Shqipërisë në rrugën e saj drejt integrimit në Bashkimin Evropian dhe mbështet me bindje rrugëtimin e reformave të brendshme. Përpjekjet tona do të jenë qëndrueshme, do punojmë që të thirret konferenca e parë ndërqeveritare qoftë me shqiptarët si dhe me Maqedoninë e Veriut. Do të nxisim të ndodhë sa më shpejtë këtë mbledhje.”
Përveç marrëveshjes së nënshkruar mes kryeministri Edi Rama dhe shefit të diplomacisë italiane, për ngritjen e një komisioni ekonomik i që do të shqyrtojë mundësitë e investimeve të përbashkëta, kreu i qeverisë tha se Italia është në krah të Shqipërisë edhe për sigurimin në kohë të vaksinës kundër Covid-19.
Më herët, Luigi Di Maio i pranishëm në tryezën e thirrur nga Ministria e Drejtësisë me temë lufta kundër korrupsionit dhe krimit të organizuar vlerësoi se përballja me korrupsionin, zbatimi i reformës në drejtësi përbëjnë elementë të rëndësishëm në rrugën e Shqipërisë drejt familjes evropiane.
