Futbollisti i përfaqësueses së Kosovës, Albion Rrahmani, në një konferencë për shtyp, për mediat italiane, ka treguar se cilët janë njerëzit dhe futbollistët që kanë ndikuar më shumë në formimin e tij si futbollist.
Sulmuesi i Vencias ka veçuar fillimisht figurën e babait të tij, i cili ka qenë gjithashtu futbollist dhe me të cilin Rrahmani është stërvitur që në moshë të vogël.
“Jam rritur me shumë yje dhe lojtarë të fortë. I pari që dua të përmend është babai im, i cili ka qenë futbollist. Jam stërvitur shumë me të kur isha i ri dhe me të diskutojmë gjithmonë shumë për futbollin”, është shprehur Rrahmani.
Por kur vjen puna te një shembull nga kampionatet më të mëdha europiane, Rrahmani nuk ka pasur asnjë dyshim: Cristiano Ronaldo.
“Nëse duhet të marr si shembull një lojtar nga kampionatet më të mira, përmend Cristiano Ronaldon. Sipas meje, ai është një nga shembujt më të mëdhenj të disiplinës dhe punës. Këto cilësi, kur i aplikon në futboll, mund të të çojnë drejt rezultateve dhe fitoreve”, ka deklaruar Rrahmani.
Fjalët e tij tregojnë qartë filozofinë që ai kërkon të ndjekë në karrierë: punë, disiplinë dhe përkushtim, pikërisht elementet që e kanë shoqëruar Cristiano Ronaldon gjatë gjithë rrugëtimit të tij në futboll.
