SHBA-të duhet të bien dakord të kompensojnë Iranin për dëmin që pësoi nga sulmet amerikane dhe izraelite kundër tij në qershor, sipas një artikulli në Financial Times sot, i cili citon Ministrin e Jashtëm iranian Abbas Araghchi.
“Ata duhet të shpjegojnë pse na sulmuan në mes të negociatave dhe duhet të na sigurojnë që kjo gjë nuk do të përsëritet gjatë negociatave të ardhshme”, tha Araghchi në një intervistë me FT.
“Dhe ata duhet të kompensojnë Iranin për dëmin që shkaktuan”, theksoi ministri iranian, ndërsa Teherani duket se po mban një qëndrim më të ashpër dhe po vendos kushte të reja për rifillimin e negociatave mbi programin e tij bërthamor me administratën e Presidentit të SHBA-së Donald Trump.
Sipas artikullit të gazetës, Araghchi dhe i dërguari special i SHBA-së Steve Witkoff shkëmbyen mesazhe gjatë dhe pas luftës Iran-Izrael, ndërsa ministri iranian theksoi nevojën për të gjetur “një zgjidhje të dobishme reciprokisht” për t’i dhënë fund mosmarrëveshjes së gjatë mbi programin bërthamor të Teheranit.
Araghchi i tha FT se Irani pret që SHBA-të të ndërmarrin hapa thelbësorë për të rindërtuar besimin, pasi Witkoff sugjeroi rifillimin e bisedimeve dypalëshe.
Ndër këto hapa, tha ministri iranian, janë kompensimi financiar për Teheranin, një çështje mbi të cilën ai nuk dha hollësi, dhe garancitë se Irani nuk do të jetë përsëri në shënjestër gjatë negociatave.
SHBA-të nisën sulme me raketa, në koordinim me Izraelin, kundër objekteve bërthamore në Iran./vizionplus.tv
