Zjarr në dy banesa në Berat, flakët rrezikuan një objekt monument kulture
Një zjarr ka rënë sot në dy banesa të pabanuara në lagjen “Çlirim” në qytetin e Beratit.
Sipas informacioneve paraprake, flakët kanë nisur fillimisht në bahçet e dy banesave dhe më pas janë përhapur me shpejtësi, të favorizuara nga temperaturat e larta dhe era.
Kanë qenë banorët ata që kanë njoftuar shërbimin zjarrfikës, i cili ka mbërritur në vendngjarje me tre mjete. Në ndihmë të tyre kanë shkuar edhe forca të Policisë.
Zjarri u përhap edhe drejt çatisë së një objekt monument kulture, por ndërhyrja në kohë e zjarrfikësve bëri të mundur lokalizimin dhe shuarjen e flakëve, duke shmangur dëme më të mëdha.
Forcat zjarrfikëse vijojnë të monitorojnë zonën për të shmangur riaktivizimin e vatrave të nxehta.
Pranë vatrës së zjarrit ndodhej edhe një automjet tip “Ford”, i cili pësoi dëmtime në pjesën e përparme, por u largua në kohë nga vendi.
Sipas burimeve nga shërbimi zjarrfikës, dyshohet se zjarri ka qenë i qëllimshëm.
/vizionplus.tv
