Presidenti Ilir Meta është takuar këtë të martë me ambasadoren e Kanadasë, Alexandra Bugailiskis.
Përmes një mesazhi në “Facebook”, Meta bën me dije se i ka kërkuar të ratifikohet sa më shpejt marrëveshja e Sigurimeve Shoqërore, pasi do të ndihmonte shumë komunitetin shqiptar që ndodhet në Kanada. Po ashtu, ata kanë diskutuar edhe për rritjen e investimeve kanadeze në vendin tonë.
“Shumë i lumtur të prisja sot Ambasadoren e Kanadasë, Sh.E.Znj Alexandra Bugailiskis. Falenderova Ambasadoren që prioritete të asistencës së qeverisë së saj për Shqipërinë janë mbrojtja e të drejtave të njeriut, demokracisë dhe shtetit të së drejtës. Vlerësova bashkëpunimin në fushën politike dhe atë të sigurisë në kuadër të NATO-s dhe organizatave të tjera ndërkombëtare. Inkurajova për më shumë investime kanadeze në Shqipëri. Shpreha mirënjohjen e thellë për integrimin model të diasporës shqiptare në Kanada. Kërkova sa më shpejt ratifikimin e Marrëveshjes së Sigurimeve Shoqërore, që do të ndihmonte shumë komunitetin shqiptar në Kanada.”
Ndër të tjera, kreu i shteti siguroi se marrëdhëniet ndërmjet dy vendeve do të forcohen edhe më shumë në të ardhmen.
