Ish-anëtari i Këshillit Kombëtar të PD, Edvin Kulluri sheh si zgjidhje të vetme të krizës politike uljen e të gjitha palëve në tryezë. Ai deklaroi për emisionin “Kapital” se duhet që presidenti, kryeministri dhe opozita të diskutojnë me tone të zbutura sesi do ta zgjidhin situatën. Sipas tij, e gjitha kjo duhet bërë pa ndërhyrjen e ndërkombëtarëve.
“Shumica absolute e shqiuptarëve kanë një klimë mosbesimi. Ka një kakofoni politike. Në këtë situatë fluide kanë përgjegjësi të gjitha palët. Më pëlqen apo jo mua Ilir Meta, kjo nuk ka rëndësi. Këto që po bën presidenti, përfshirë edhe denoncimin ndaj zonjës në fjalë, besoj se janë të drejta. Nëse këto nuk mund të zgjidhen në një tryezë politike… O do të shkojmë në një tryezë politike për të gjetur një zgjidhje, presidenti, mazhoranca dhe opozita. Duhet të ulen të gjejnë një zgjidhje pa ndërkombëtarët. Sepse duhet të tregojmë që nuk jemi ca karagjozë që nuk merremi vesh për asgjë. Sepse përgjegjësinë e kanë këta, jo ndërkombëtarët. Presidentin unë e shoh pa faj.”
Dhe në rast se zgjidhja nuk gjendet ne tryezë, atëherë Kulluri paralajmëroi se populli do të ngrihet kundër autokracisë që rrezikon të instalohet.
“Nëse nuk zgjidhet në tavolinë, kjo punë do të shkojë shumë keq, do të shkojmë në autokraci. O do ta pranojmë, o do të çohemi kundër autokracisë. Unë mendoj që shqiptarët nuk kanë pse ta pranojnë përdhunimin, do të gjejnë rrugën për ta shmangur. Këta njerëz duhet të mbajnë përgjegjësi përfundimisht sepse e kanë bërë këtë vend çorap.”
