Organizata terroriste, ISIS ka pranuar autorësinë e sulmit që tronditi sot vendin me popullsinë më të madhe muslimane në botë.
Të paktën 14 persona kanë humbur jetën dhe më shumë se 40 të tjerë janë plagosur si pasojë e sulmeve kamikazë të ndërmarra në 3 kisha në qytetin Surabaya të Indonezisë. Dyshohet se atentatorët ishin anëtarë të të njëjtës familje, nëna, babai dhe 4 fëmijët adoleshentë. Familja kamikazë kishte pak kohë që ishte kthyer nga Siria.
Ditë më parë, pesë anëtarë të forcave indoneziane të sigurisë u vranë gjatë një bastisje me të burgosurit militantë islamikë në një burg të sigurisë në periferi të kryeqytetit Xhakarta.
Indonezia është vendi më i populluar mysliman në botë me më shumë se 82% të popullsisë myslimane, ndërsa rreth 10% e popullsisë janë të krishterë.
Vendi ka luftuar për shumë kohë me grupet e brendshme terroriste, veçanërisht grupin e lidhur me al-Kaedën, Jemaah Islamiyah, i cili mori përgjegjësinë për 11 sulme në mes të viteve 2000 dhe 2010, përfshirë këtu edhe bombardimet vdekjeprurëse në Bali në vitin 2002, të cilat lanë më shumë se 200 njerëz të vdekur dhe qindra të plagosur.
