Lideri i opozitës Sali Berisha akuzoi kryeministrin Edi Rama dhe kreun e bashkisë së Tiranës si përgjegjës për inceneratorin e Tiranës. 3 ditë pasi SPAK lëshoi 15 urdhërarreste për inceneratorin e Tiranës, Berisha deklaroi se shefi i qeverisë është politikani kryesor që duhet të mbajë përgjegjësi penale.
Lideri i opozitës tregoi një shkresë të Ylli Manjanit, në atë kohë ministër i drejtësisë, në të cilën vihet në dukje se këshilli i ministrave nuk ka kompetencë t’i japë 8 pikë bonus kompanisë së inceneratorëve, duke shtuar se një tjetër ministre, Ermonela Felaj, kishte bërë një shkresë, ku theksonte se kjo kompani as nuk ekzistonte.
“ Do sjell para jush një shkresë dërguar ministrit Lefter Koka me datën 15 nëntor 2016 nga ministri i Drejtësisë, Ylli Manjani, i cili shprehet se: nisur nga interpretimi literal i kësaj dispozite si dhe nga analiza në tërësi e nenit 25 të ligjit 125/213 që trajton propozimet e pakërkuara, konstatojmë se në asnjë pikë të tij nuk përmendet apo autorizohet shprehimisht Këshilli i Ministrave për miratimin e dhënies së bonusit.”, tha Sali Berisha.
Berisha ka akuzuar prokurorinë e posaçme se ka mbrojtur kryetarin e bashkisë së Tiranës, duke mos i përmendur emrin Erion Veliajt asnjëherë të vetme.
“Veprimet, firmat e Erion Veliajt janë në themel të vjedhjes së shekullit, se ai personalisht me firmën e tij, në një akt mashtrimi të rëndë zyrtar, mori atributet e Këshillit Bashkiak të Tiranës dhe Këshillit të Qarkut të Tiranës.”, theksoi më tej Berisha.
Lideri i opozitës Berisha është prej kohësh një prej kritikëve më të fortë të SPAK, i cili sipas tij vepron në bazë të urdhrave politikë të kryeministrit Edi Rama./vizionplus.tv
