Hezbollahu tha se ka lëshuar më shumë se 200 raketa në objektet ushtarake izraelite si hakmarrje për vrasjen e një prej komandantëve të saj të lartë në Libanin jugor.
Muhammed Neamah Naser, një komandant në Njësinë Aziz të Hezbollahut, u “eliminua” të mërkurën, thanë Forcat e Mbrojtjes të Izraelit (IDF).
IDF e fajësoi Naser për drejtimin e sulmeve terroriste si para dhe pas sulmeve të Hamasit më 7 tetor.
IDF e përshkroi atë si një homolog të Sami Taleb Abdullahut, një tjetër komandant i Hezbollahut, vrasja e të cilit muajin e kaluar shkaktoi gjithashtu një valë sulmesh hakmarrëse.
“Së bashku, ata shërbyen si dy nga terroristët më të rëndësishëm të Hezbollahut në Libanin jugor,” tha IDF.
Në përgjigje të vrasjes, Hezbollahu tha të enjten se kishte lëshuar “më shumë se 200 raketa të llojeve të ndryshme” në objektivat izraelitë.
Ushtria izraelite deklaroi se ka kapur disa nga raketat e Hezbollahut, si dhe drone. Disa zjarre kanë shpërthyer si pasojë e rënies së copëzave.
Në përgjigje të këtyre sulmeve, IDF u shpreh se avionët e tyre luftarakë kanë goditur objektivat e Hezbollahut në Libanin jugor gjatë natës të së mërkurës.
IDF shtoi se ata goditën një strukturë ushtarake dhe tre “lokacione të infrastrukturës terroriste”.
Naser është komandanti i fundit i Hezbollahut që u vra në armiqësitë që shpërthyen përgjatë kufirit Izrael-Liban që nga sulmet e 7 tetorit.
Hezbollahu është një nga forcat paraushtarake më të fuqishme në Lindjen e Mesme, që mburret me dhjetëra mijëra luftëtarë dhe një arsenal të madh raketash. Grupi ka thënë se qëllimi i tij është të mbështesë palestinezët në Gaza.
Sulmet izraelite në Liban kanë vrarë më shumë se 300 luftëtarë të Hezbollahut dhe rreth 90 civilë, sipas raporteve të Reuters. Ndërkohë, Izraeli thotë se zjarri nga Libani ka vrarë 18 ushtarë dhe 10 civilë./vizionplus.tv
