Presidenti Bajram Begaj, ka reaguar pas ngjarjes së rëndë të ndodhur këtë pasdite në Shëngjin, ku dy të rinj nga Kosova humbën jetën si pasojë e mbytjes në det, ndërsa tre të tjerë u shpëtuan në plazhin e “Ranës së Hedhun”.
Me një mesazh ngushëllimi, kreu i Shtetit shprehu dhimbjen e thellë për humbjen e jetës së dy të rinjve dhe solidaritetin me familjet e viktimave.
“Me hidhërim të thellë mësova për ngjarjen tragjike që u mori jetën dy të rinjve nga Kosova sot në Shëngjin. Në këto çaste të vështira, shpreh ngushëllimet më të sinqerta për familjet dhe të afërmit e viktimave, ndërsa uroj shërim sa më të shpejtë për tre shokët e tyre,” tha Begaj.
Presidenti nënvizoi se kjo tragjedi është një kujtesë e fortë për rëndësinë e kujdesit dhe respektimit të çdo mase sigurie në plazhet e vendit.
Ai bëri thirrje për angazhim maksimal të institucioneve dhe operatorëve turistikë për të garantuar sigurinë e pushuesve gjatë gjithë sezonit veror.
“Nisur nga ky rast i rëndë, ftoj institucionet qendrore dhe vendore, si edhe operatorët turistikë, të marrin të gjitha masat e nevojshme për të garantuar sigurinë në plazhe gjatë gjithë sezonit veror, me qëllim parandalimin e ngjarjeve të tilla dhe mbrojtjen e jetës së qytetarëve dhe vizitorëve,” u shpreh ai.
