Mazhoranca dhe opozita parlamentare kanë firmosur marrëveshjen për votimin e “5 Qershorit” në seancën plenare të 23 korrikut, si dhe votimin e ndryshimeve kushtetuese. Dokumenti u firmos nga kreu i Grupit të PS, Taulant Balla dhe deputetët, Myslim Murrizi, Nimet Musai dhe Edmond Stojku.
Deputetja e opozitës parlamentare, Rudina Hajdari gjatë një prononcimi për mediat e quajti një ditë historike për vendin drejt demokracisë, ndërsa theksoi se ka mbajtur premtimin para qytetarëve, për listat e hapura.
“Shqiptarët zgjedhjet e ardhshme do të votojnë atë që duan vetë dhe jo kryetari. Ajo që është dukur si e pamundur, një premtim që unë e mbajta. Jam para jush dhe them që jam “premtimmbajtëse”. Jemi këtu falë mbështetjes qytetare. Sot është moment i rëndësishëm për demokracinë. Dua t’i bëj thirrje opozitës jashtëparlamentare që t’i bashkohen “trenit” të së ardhmes.”
