Gjykata e Fierit ka dënuar me 25 vite burg 34-vjeçarin Laert Hasalla, i cili akuzohet se porositi një vrasje të mbetur në tentativë për motive gjakmarrjeje. Vendimi u ekzekutua nga Specialistët për Hetimin e Krimeve të Rënda në DVP Fier, ndërsa Hasalla ndodhej nën masën e sigurisë “Arrest në shtëpi”.
Sipas hetimeve, në vitin 2023 Hasalla kishte porositur vrasjen e Marius Hasallës, duke paguar 31-vjeçarin Mariglen Matjani, tashmë i dënuar. Ky i fundit qëlloi me armë zjarri në drejtim të një automjeti ku ndodhej objektivi, por nga të shtënat mbeti e plagosur Bajame Sejena, halla e Marius Hasallës, e cila udhëtonte në të njëjtin mjet.
Ngjarja lidhet me një konflikt të hershëm për gjakmarrje mes dy degëve të familjes Hasalla. Shkak i përplasjes ka qenë një konflikt për pronësinë e një toke prej rreth 2 hektarësh, i cili u përshkallëzua në vitin 2021. Në atë kohë, Kastriot Hasalla vrau me armë zjarri 30-vjeçarin Romeo Hasalla, vëllain e Laert Hasallës, dhe plagosi disa persona të tjerë. Për këtë krim, Kastriot Hasalla u vetëdorëzua dhe u dënua me 35 vite burg.
Sipas policisë, atentati ndaj Marius Hasallës u organizua si akt hakmarrjeje për vrasjen e Romeo Hasallës, por plani dështoi dhe viktimë mbeti një person i pafajshëm.
Njoftimi i policisë:
DVP Fier
Porositi një vrasje të mbetur në tentativë për motive gjakmarrjeje, 34-vjeçari dënohet me 25 vite burg.
Specialistët për Hetimin e Krimeve të Rënda në DVP Fier ekzekutuan vendimin e Gjykatës së Fierit, e cila e dënoi me 25 vite burg, për veprën penale “Vrasja në rrethana cilësuese”, e mbetur në tentativë, shtetasin:
L. H., 34 vjeç, banues në fshatin Garunjas, Lushnjë.
Ky shtetas ndodhej nën masën e sigurisë “Arrest në shtëpi”, pasi dyshohej se kishte porositur vrasjen e shtetasit M. H., në vitin 2023.
Nga hetimet rezultoi se shtetasi L. H. kishte paguar shtetasin M. M., 31 vjeç (aktualisht i dënuar), i cili ka qëlluar me armë zjarri në drejtim të një automjeti, me qëllim vrasjen e shtetasit M. H.
Si pasojë e të shtënave, mbeti e plagosur shtetasja B. S., e cila udhëtonte në të njëjtin automjet me shtetasin M. H.
/vizionplus.tv
