Partia Demokratike pritet të bëjë publike këto ditë programin elektoral, me të cilin do të shkojë në zgjedhjet parlamentare të 25 prillit. Sa i përket programit ekonomik, Mateo Spaho, ekonomist pranë PD deklaroi në E-ZONË se taksa e sheshtë prej 9% do të aplikohet në të gjthë sistemin.
“Ne mendojmë se niveli prej 9% do të aplikohet tek të ardhurat personale, nga 23 % që është ky nivel aktualisht, do të ulte tendecat e profesionistëve që të fshehin të ardhurat e tyre. Do të rriste meritokracinë dhe dëshirën për të punuar. Një taksë 9% për sigurimet, si për punëmarrësin dhe punëdhënësin do ta thjeshtëzonte më shumë këtë sistem dhe do ta bënte koston e punës shumë më të lirë.”
PD ka në objektivin e saj që paga minimale brenda një mandati qeverisës të arrijë në 40 mijë lekë. Paralelisht, Partia Demokratike ka në plan që të rikthejë konceptimin e zonave të lira ekonomike, ku sipërmarrësit mund të aplikojnë për të kryer investimet e tyre duke i ofruar infrastrukturën e nevojshme.
