Kryetari i PBDNJ-së, Vangjel Dule nga studioja e “Zgjedhje 2021” shprehet se sulmi i regjistruar këtë të hënë në zyrën elektorale të PD duhet të dënohet kategorikisht.
Ai kërkoi zbardhjen sa më parë të incidentit, në mënyrë që të shmangen pasojat e mëtejshme.
“Vendi, mënyra ndaj viktimës që u krye ky akt dëshmon që është një akt i rëndë që duhet dënuar në mënyrë absolute nga të gjithë. Ashtu sikurse pretendohet nga PS që mos të politizohet, nuk duhet as që PS ta nxjerrë nga konteksti politik. Të flasë sa më parë Policia e Shtetit, që të shmangë pasojat e mëtejshme. Duhet vetëpërmbajtje. Duhet të zbardhet sa më parë zbardhja e këtij incidenti. I uroj shërim të shpejtë të lënduarit të këtij sulmi.”
Duke komentuar deklaratën e Ramës për këtë ngjarje, i cili dënoi aktin e autorit dhe i kërkoi Metës që të ndalojë “fushatat idioteske”, Dule theksoi se nuk është momenti që ata të lajnë hesapet me njëri-tjetrin.
“Rama shpeshherë me retoriken e tij stigmatizon individë, duke i bërë objekt agresioni. Presidenti i Republikës është votuar nga PS dhe LSI. Populli shqiptar nuk ia ka për borxh Ramës që të lajë hesapet me Ilir Metën…Më provokuesi deri më tani ka qenë Rama. I është larguar ballafaqimit politik, argumentit dhe është përqëndruar në sulme personale.”
