Champions luan sonte ndeshjet e tjera të fundit të javës së gjashtë të fazës së ligës. Dhe çfarë ndeshje në fakt…janë dy supersfida të cilat do të tërheqin vëmendje maksimale në Vizion Plus dhe Tring për të gjithë të apasionuarit pas futbollit të bukur.
Në Vizion Plus në orën 21:00 përplasja në Gjermani mes Borusia Dortmund dhe Barcelonës.
Janë dy ekipe të cilat ndodhen në kuotë të njëjtë pikësh, 12 secila në renditje.
Kush fiton do të jetë automatikisht ne vendin e dytë në renditjes pas krahëve të Liverpul, ndërsa në rast barazimi lista e skuadrave që do të ndanin vendin e dytë me 13 pikë do të bëhej e gjatë pasi aktualisht janë aty Brest, Inter, Aston Vila dhe Bajer Leverkusen.
Veç të tjerash kemi të bëjmë me dy ekipe që parapëlqejnë stilin ofensivë ndaj me siguri do të kemi një duel të mrekullueshëm i gjithi për tu shijuar, në një stadium unik sikurse ai i Borusia Dortmund.
Këta të fundit vijnë pas një barazimi në klasiken e Bundesligës kundër Bajernit, ku shënoi Gitens.
Ky i fundit së bashku Em Xhurasi, Nmecha dhe Maksimilian Bajer janë duke kaluar një formë shumë të mirë, shqetësimi i vetëm i rëndësishëm tek gjermanët është problem fizik që ka qendërmbrojtësi Niklas Sule.
Në dispozicion mund të rikthehet Adejemi ndërkohë. Barcelona e Hansi Flik kërkon të gjejë veten në Champions, pasi në kampionat nuk ka bërë mirë duke fituar vetëm 1 nga 5 takimet e fundit radhazi.
Katalanasit do të mbështet tek një ish i madh sikurse Levandoski, apo edhe tek yjet e tjerë Dani Olmo, Rafinja, Jamal dhe Pedri.
Një tjetër duel i madh i mbrëmjes që transmetohet në Tring është ai i Torinos mes Juventus dhe Manchester City.
Dy skuadra që së fundmi u njohën me shortin e botërorit të klubeve që luhet vitin e ardhshëm në SHBA ku anglezët dhe italianët do të jenë në një grup. Megjithatë në të sotme, ato janë dy ekipe me problem në rezultate dhe lojë.
Sidomos Manchester City i Pep Gaurdioles që është në një krizë të thellë që askush, e aq më tepër vetë Guardiola, nuk po i jep dot shpjegim.
Vetë trajneri spanjoll deklaroi në konferencën para kësaj sfide që ka vendosur që të mos drejtojë më asnjë klub tjeter pas eksperiencës me Manchester City.
Anglezët sikurse edhe Juventus kanë 8 pikë dhe në rast se duan të kualifikohen direkt për në fazën tjetër nuk kanë rrugë tjetër veç fitores sonte, megjithëse mungesat tek qytetarët janë të rëndësishme nga Rodri, tek Foden, Kovacis, Stons apo Akanzhi.
Shumë shqetësime të kësaj natyre edhe Juventusi që pas ndalesa të njëpasnjëshme edhe në kampionat është larguar jo pak nga lufta për titull. Pak gjëra pritet të ndryshojnë në formacion në raport me duelin e barazuar me Bolonjën në kampionat. Kambiazo i dëmtuar në takimi e fundit duhet të jetë në stol ndërsa Bremer, Niko Gonzxale, Kabal dhe Milik janë jashtë.
Në duelet e tjera të mbrëmjes, Milani kërkon oksigjen në Champions, atë që nuk e ka në kampionat ku është një situatë goxha të vështirë. Sonte në shtëpi përballë një rivali modest i Cvervan Zvenzda kuqezinjtë kanë shansin të ngjitën në kuotën e 12 pikëve, duke u afruar ndjeshëm me kreun. Arsenali pret në shtëpi Monacon ndërsa Lila e Edon Zhgeroves kërkon një trepikësh radhë ndaj Sturm Grac./vizionplus.tv
