Artdashësit matjan mirëpritën edhe këtë vit për herë të pestë festivalin folklorik me pjesmarrës nga të gjitha trevat shqipfolëse. Në ambjentet e pallatit të kulturës në Burrel u mbajt edicioni i V-të i Festivalit Mbarëkombëtarë Folklorik “Kënga Epike e Lirike”. Hapjen e festivalit e bëri Drejtori i Qendrës Kulturore Mat, Sokol Meta i cili tha se tradita do të vazhdojë, ndërsa falenderoi Bashkinë Mat për mbështetjen.
Në këtë edicion morën pjesë Rapsodët e Sharrit, Rapsodi matjan Shefqet Merra, Grupi Folklorik Gurra e Kurbinit, Grupi Artistik Kamëz, rapsodët nga Medvegja, Ansambli Gjilani dhe Ansambli “Shote Galica” Drenas.
Pas numrave garues juria e drejtuar nga kantautori Mark Gjoka u tërhoq për vendimet e çmimeve fituese, ndërsa skenën ja lanë numrave përshëndetës të këngëtarëve Shkëlqim Farrici, Mide Aliu nga Kurbini, Kurt Lika, Hysni Hoxha, Fadil Llugaxhiu e Marjan Lleshi si dhe Flora Gashi. Në fund ishte kryetari i jurisë së këtij festivali Mark Gjoka i cili zbuloi edhe çmimet e këtij edicioni. Fitues i edicionit të V-të të Festivalit Kënga Epike e Lirike Burrel u shpall Ansambli “Shote Galica”, Drenas.
Numrat garues e ata përshëndetës morën duartrokitjet e artdashësve matjan të cilët kishin mbushur sallën e Pallatit të Kulturës.
