Partia properëndimore Gerb e qendrës së djathtë e drejtuar nga ish-kryeministri Bojko Borisov ka fituar zgjedhjet e parakohshme parlamentare në Bullgari. Ajo siguroi 32,63 përqind te votave kundrejt 26,8 përqind që morën rivalët socialistë me orientim prorus.
Ndonëse nuk mori shumicën për të formuar i vetëm qeverinë, Borisov pritet të bëhet për herë të tretë kryeministër dhe të bashkëpunojë me disa parti të vogla. Në parlament kanë hyrë aleanca nacionaliste, Patriotët e Bashkuar me 9,2 përqind të votave, një parti e minoritetit turk dhe një tjetër populiste.
“Ne kemi mundësinë për të marrë presidencën e radhës së BE në muajin janar. Shpresoj se do të formojmë së shpejti qeverinë e re të qëndrueshme, por edhe që të kemi edhe një opozitë të qëndrueshme. Situata është shumë e ndërlikuar dhe duhet të bëjmë më të mirën për të bashkuar vendin”.
Zgjedhjet e së dielës u ndoqën me interes nga BE për drejtimin që do të merrte vendi, pasi Partia Socialiste ishte shprehur për përmirësim të raporteve me Moskën. Ish-kryeministri Borisov dha dorëheqjen vitin e shkuar, pasi në zgjedhjet presidenciale fitoi një kandidat socialist. Bullgaria është vendi më i varfër i unionit dhe korrupsioni mbetet një nga problemet kryesore.
