Deputeti demokrat, Luciano Boçi, ka reaguar ashpër pas shpërthimit të transformatorit në Universitetin Bujqësor.
Boçi përmes një statusi në profiling e tij në Facebook, ka akuzuar kryeministrin Edi Rama për lidhjet e tij me krimin, duke mbështeur zërin e stduentëve dhe kauzën e protestës së Arsimit të Lartë.
Sipas deputetit demokrat ka gjashtë vite që Rama i Sarajeve dhe banda e tij grabisin, rrjepin, zhvasin studentët pa bërë asnjë investim për kushtet më minimale në godina.
“Shpërthimi i transformatorit brenda godinës së Universitetit Bujqësor, shpërthen para opinionit qytetar gjendjen skandaloze të Universiteteve publike. Falë Zotit dhe vendosmërisë së studentëve për të vazhduar protestën, ata nuk ishin aty, përndryshe, situata do ishte katastrofike.
E drejta e protestës së tyre sot ulëret me shumë se kurrë.
Ka gjashtë vite që Rama i Sarajeve të deklaruara 400 milionë e të pajustifikuara, si dhe banda e tij grabisin, rrjepin, zhvasin studentët pa bërë asnjë investim për kushtet më minimale në godina.
Ka gjashtë vite që Rama i familjes me banka në parajsa fiskale, rrëmben nga xhepat e shqiptarëve edhe qindarkën e fundit, pa hedhur asnjë lek për arsimimin e të rinjve e fëmijëve.
Ka gjashtë vite që Rama i Koncesioneve 2.2 miliardë euro, pjell ligje për të vjedhur, shembur, rrafshuar pasuritë, shtëpitë e katanditë e qytetarëve dhe nuk pranon të hedhë poshtë ligjin që ka hedhur në erë Universitetet publike.
Ka gjashtë vite që Rama i PPP-ve, ka partner krimin, klientelën, kusarinë dhe ka shpallur armiq studentët, pedagogët e qytetarët.
Është detyrë e të gjithëve ne, shumicës reale, ta shpërthejmë nga themelet këtë pakicë të kalbur që drejton vendin!”
