Kryetari i PD-së, Lulzim Basha bën përgjegjës për ngërçin në reformën në drejtësi, kryeministrin Rama. Sipas tij, kreu i qeverisë frikësohet nga pasojat e funksionimit të kësaj reforme.
Ai ritheksoi se 25 prilli do të jetë dita kur shqiptarët do të votojnë një kryeministër që ka si objektiv luftën kundër korrupsionit dhe krimit të organizuar.
“Reforma në drejtësi ka ngelur në vendnumëro për shkak të frikës së Ramës nga drejtësia. 25 prilli do të jetë dita kur shqiptarët do të votojnë një kryeministër si unë që do të luftojë krimin. Larg duart nga reforma në drejtësi dhe zbatim i plotë i saj. Larg duart nga drejtësia, është një nga shtyllat ku unë besoj dhe shtyllat e programit tonë. Ajo që kemi vuajtur me Ramën është kapja e drejtësisë nga politika. Rama është shkaku dhe pengesa kryesore e reformës në drejtësi”, tha Basha.
Sa i përket kandidaturës së Najada Çomos dhe Luljeta Bozos në Qarkun e Tiranës, kreu i demokratëve përsëriti se nuk ka rëndësi kush është në listën e Ramës, rëndësi ka që ai nuk i shpëton dot ndëshkimit.
