Takimi me kabinetin qeveritar, reagon Rama: “Prania Besnike” dhe “Shqipëria Sociale” në fokus
Kryeministri Edi Rama ka reaguar në rrjetet sociale pas takimit me drejtuesit politikë dhe kabinetin qeveritar.
Rama ka bërë të ditur se vijon puna për detajimin e programit të sezonit të ri qeverisës, me fokus te forcimi i komunikimit me qytetarët dhe përmirësimi i shërbimeve publike.
Kryeministri shkruan se gjatë diskutimeve të sotme është trajtuar kalendarizimi i “Pranisë Besnike” në çdo territor, si dhe mekanizmat e rinj të ndërveprimit mes qeverisë dhe deputetëve.Në fokus të takimit ka qenë gjithashtu hartimi i ndryshimeve ligjore për “PasqyrAlbania”, platformë e cila synon të ndjekë dhe adresojë problematikat e qytetarëve.
“Vijuam sot punën intensive për detajimin e programit të sezonit të ri, duke nisur nga kalendarizimi i Pranisë Besnike në çdo territor, mekanizmat e rinj të ndërveprimit qeveri – deputetë në funksion të përmirësimit të mëtejshëm të shërbimeve publike qendrore e vendore, si edhe hartimi i ndryshimeve ligjore për PasqyrAlbania. Po ashtu u diskutua progresi i bërë me hartimin e nismës së integruar Shqipëria Sociale, të cilës do t’i kushtohet një Konferencë e posaçme Kombëtare në muajin nëntor”, shkruan Rama.
/vizionplus.tv
