Kryetari i PD, Lulzim Basha kërkoi nga organet e reja të drejtësisë që të veprojnë për aferën e inceneratorëve. Ai deklaroi para gazetarëve se me anë të kësaj afere po pastrohen para të pista.
“Afera e inceneratorëve, pastrim i parave të pista, përpos vjedhjes së parave të qytetarëve. Afera e inceneratorëve do të jetë një test kyç i institucioneve të reja të drejtësisë. Paratë e inceneratorëve do të gjurmohen kudo që kanë shkuar dhe do t’u kthehen shqiptarëve.”
Për Bashën, me paratë e shpenzuara me inceneratorët fare mirë mund të ishte përballuar kriza e pandemisë. Ai përsëriti edhe një herë pesë hapat që sipas tij, janë të nevojshme për të menaxhuar krizën.
Gjithashtu, lideri i opozitës foli edhe për situatën me naftëtarët. Ai tha se problemi i tyre mund të zgjidhet lehtësisht nëse qeveria nuk bëhet palë me oligarkët.