Ministria e Mbrojtjes ka publikuar përditësimin e fundit mbi situatën e zjarreve në vend, ku gjatë ditës së sotme, 5 shtator, janë raportuar 21 vatra zjarri. Nga këto, 11 vijojnë aktive, 5 janë nën mbikëqyrje dhe 5 janë shuar.
Në operacionet për përballimin e situatës janë angazhuar 587 forca operacionale vendore, 52 automjete zjarrfikëse, si dhe 550 efektivë dhe 7 automjete zjarrfikëse të Forcave të Armatosura. Nga ajri operacionet janë mbështetur nga 4 helikopterë dhe një avion Air Tractor.
Situata më problematike vijon në qarkun e Fierit, ku vatrat në Drizë/Radostinë, Vadhizë, Peshtan dhe Levan mbeten aktive. Në terren janë angazhuar forca të shumta zjarrfikëse, vendore dhe ushtarake, me mbështetje nga ajri.
Edhe në Bardhaj të Shkodrës zjarri vijon të jetë aktiv, ndërsa në Lundre dhe Madhesh të Matit operacioni mbështetet nga efektivë të Forcave të Armatosura.
Në Himarë, zjarri në lagjen “1 Maji” është shuar pas një operacioni të gjerë. Megjithatë, flakët kanë shkaktuar dëme të konsiderueshme, ku janë djegur 6 banesa, 3 prej tyre të banuara, ndërsa 36 persona janë evakuuar.
Në Dajt, një vatër vijon aktive dhe po monitorohet nga forcat në terren. Ndërkohë, vatra në Qinami është nën mbikëqyrje dhe, sipas autoriteteve, nuk paraqet rrezik për zonat e banuara.
Vatra aktive raportohen edhe në Vajkal, Mallunxë–Lis, Gallatë, Kalivaç–Zimaj–Kashnjet, Krastë të Elbasanit, Iballë dhe Krepse. Ndërkohë, zjarret në Mavrovë të Selenicës dhe malin “Partizan” në Berat janë shuar.
Agjencia Kombëtare e Mbrojtjes Civile vijon monitorimin e situatës në të gjithë territorin, në koordinim me prefekturat, bashkitë dhe strukturat e tjera të Mbrojtjes Civile.
Kapacitetet operacionale mbeten në terren dhe në gatishmëri për ndërhyrje, me prioritet mbrojtjen e jetës së qytetarëve, banesave dhe pasurisë.
