Pak orë pas vdekjes së Papa Françeskut nga një goditje në zemër, Kisha Katolike po përgatitet për funeralin e Papës, i cili hyri në histori si “Papa i të varfërve”.
Sa me përulësi jetoi dhe drejtoi Kishën, aq me përulësi do të varroset, me një ritual të ri që do ta “përurojë vetë”.
Varrimi i Papa Françeskut do të bëhet 4 deri në 6 ditë më vonë, në sheshin e Shën Pjetrit . Siç ndodhi me Papa Gjon Palin II, i cili dha frymën e fundit më 2 prill 2005 dhe varrimi i tij u bë më 8 prill.
Për funeralin e Papa Françeskut ende dihet pak. Deri tani dihet se një numër i madh personalitetesh do të marrin pjesë, mes tyre presidenti i SHBA Donald Trump dhe Zonja e Parë e Shteteve të Bashkuara, Melania.
“Unë dhe Melania do të jemi të pranishëm në funeralin e Papa Françeskut në Romë. Mezi presim të jemi atje”, shkruante Trump në mesazhin e tij, ndërsa më herët kishte shprehur fuqishëm mbështetjen për katolikët.
I pranishëm pritet të jetë edhe nënpresidenti amerikan J.D. Vance, i cili ishte takuar me Papën një ditë para se të jepte frymën e fundit.
Ndër të fundit që takuan Papën ishte edhe 88-vjeçari Charles, Mbreti i Anglisë, së bashku me gruan e tij Camilla, por ata ndoshta nuk do të marrin pjesë në funeralin.
Familja mbretërore pritet të përfaqësohet nga Princi William, trashëgimtar i fronit britanik.
Megjithatë, tashmë në sheshin e Shën Pjetrit, ku Papa Françesku bëri paraqitjen e tij të fundit me publikun duke thirrur “Viva il Papa” (“Rroftë Papa”) vetëm 19 orë para se të vdiste, mijëra besimtarë kanë filluar të mblidhen për të vajtuar humbjen e tij.
Para varrimit, trupi i Papës pritet të qëndrojë për tre ditë në Bazilikën e Shën Pjetrit.
Pavarësisht se ku vdes Papa, varrimi bëhet gjithmonë në Vatikan, konkretisht në sheshin e Shën Pjetrit, nëse moti e lejon.
Njëkohësisht me funeralin, do të zhvillohet një operacion sigurie i madh, pothuajse i paprecedentë. Rreth 4 milionë njerëz mbushën rrugët e Vatikanit gjatë funeralit të Gjon Palit II në 2005, së bashku me 8,000 personel sigurie, duke përfshirë 2,000 policë me uniformë dhe 1,400 policë me rroba civile.
Rituali do të kryhet sipas traditës, ndonëse Papa Françesku e ndryshoi së fundmi duke e thjeshtuar. Kjo është bërë për të “theksuar edhe më shumë se funerali i Papës është ai i një bariu dhe dishepulli të Krishtit dhe jo i një njeriu të fuqishëm të kësaj bote”, shpjegoi drejtori i ceremonive liturgjike të Vatikanit, Kryepeshkopi Diego Ravelli.
Papa Françesku “ka deklaruar në mënyrë të përsëritur nevojën për të thjeshtuar dhe përshtatur disa ceremoni, në mënyrë që kremtimi i funeralit të peshkopit të Romës të shprehë më mirë besimin e Kishës në Krishtin e ringjallur”.
Ceremonia pritet të zgjasë afërsisht dy orë e gjysmë dhe do të jetë, në pjesën më të madhe, në latinisht, por me shtimin e disa ritualeve papale.
Varrimi do të bëhet nga dekani i Collegium Cardinalium. Ky pozicion aktualisht mbahet nga kardinali Giovanni Battista Re, një italian 91-vjeçar; zv.kancelar është kardinali argjentinas Leonardo Sandri, 81 vjeç. Të gjithë 252 kardinalët do të jenë të pranishëm.
Pas ceremonisë, trupi transportohet nga “dera e vdekjes” në të majtë të altarit në kishën e Shën Pjetrit, ndërsa bie një zile funerali. Himnet e kongregacionit përfshijnë vargje nga Psalmi 117 (“Më hapni portat e drejtësisë”) dhe Psalmin 41 (“Në shoqërinë e lavdishme të shenjtorëve, unë do të shkoj në shtëpinë e Perëndisë”).
Në kundërshtim me traditën e kohëve të fundit, Françesku kërkoi të varrosej në Bazilikën e Shën Marisë Major,duke përmendur “lidhjen shumë të fortë” të saj me kishën e lashtë, e cila ndodhet jashtë mureve të Vatikanit.
Fjala e fundit, megjithatë, i takon kardinalëve, të cilët do të vendosin nëse do t’ia plotësojnë dëshirën. Kujtojmë se Papa Gjon Pali II kishte kërkuar që të varrosej në vendlindjen e tij, Poloni, një dëshirë që nuk iu plotësua nga kardinalët./vizionplus.tv
