“Pse proteston Partia Demokratike më 8 shkurt”, ishte tema e kësaj të marte në Quo Vadis nën drejtimin e Pranvera Borakajt.
Gazetari Flogert Muça tha se Partia Demokratike nuk po bën protestë, por mitingje. Sipas tij, opozita është duke bërë një pazar me qeverinë aktuale.
Muça shton se Partia Demokratike do të shohë se sa mbështetës ka para zgjedhjeve të 11 majit.
Pjesë nga biseda:
Muça: Unë jam i bindur që PD nuk po bën protestë, por po bën mitingje. Në zgjedhje nuk bëhen protesta, por mitingje. Thelbi është që më 11 maj jepet shuplaka e vërtetë me votë. Protesta në këtë moment nuk ka kuptim. Po kërkon zgjedhje të parakohshme? Jo, zgjedhjet ja ku janë. Po kërkon ndonjë pazar nga Rama, që në datën 13 kur të votohet kodi i ri elektoral të marrë diçka? Ndoshta.
Borakaj: Çfarë kërkon opozita?
Muça: Që ka pazar, ka, sepse ajo është quajtur marrëveshje, por për mua është pazar. Të shkosh tek organizata kriminale që është PS me në krye Edi Ramën, të bashkohesh tek vota për amnistinë penale dhe më pas të mbyllësh listat ndoshta, për mua është pazar. E radhës mund të jetë që këta të opozitës do shkojnë tek Komisioni Xhafaj dhe më pas mund të bashkohen në ‘Shqipëria 2030’. Jam shumë dakord që gjithmonë të protestohet, por duhet të ketë një sens. Protesta duhet të ketë një kauzë. Protestat nuk janë normale në kohë zgjedhjesh. Znj. Çupi (e ftuar në Quo Vadis) ju sapo thatë që ju po bëni protestë për të parë edhe sa mbështetës ka partia juaj. /vizionplus.tv
