Policia e Lezhës po vijon hetimet intensive për zbardhjen e vrasjes së dyfishtë të Kreshnik dhe Gentjana Mujecit, ndërsa janë zbuluar detaje të reja mbi mënyrën e organizimit të atentatit.
Sipas burimeve policore, janë identifikuar të paktën dy automjete të përdorura nga autorët, njëri me ngjyrë të zezë dhe tjetri gri, por modeli i tyre nuk bëhet publik për shkak të hetimeve në vijim. Dyshohet se në këto mjete udhëtonin katër persona, të cilët kanë ndjekur për disa kilometra automjetin tip “Audi Q7” që drejtohej nga 39-vjeçari.
Autorët kanë zgjedhur një segment të ngushtë rruge për të realizuar sulmin, ku njëri prej automjeteve i ka prerë rrugën viktimës dhe më pas është hapur zjarr me breshëri. Në vendin e ngjarjes janë sekuestruar të paktën 40 gëzhoja, çka tregon për një sulm të mirëorganizuar.
Pas krimit, autorët janë larguar në drejtim të Torovicës, zonë që ofron disa dalje strategjike drejt Velipojës, Shkodrës dhe Shëngjinit, duke vështirësuar ndjekjen e tyre.
Hetimet janë përqendruar në disa pista, ku ajo kryesore mbetet hakmarrja për një ngjarje të ndodhur rreth 10 vite më parë. Në atë kohë, Kreshnik Mujeci dyshohej si i përfshirë në ekzekutimin e Genc Mhillajt në zonën e Malit të Jushit, në Shkodër.
Në kuadër të hetimeve, policia ka ushtruar kontrolle në disa banesa në Torovicë, Malecaj dhe Balldre, si dhe ka marrë në pyetje disa persona, por deri më tani nuk është arritur në identifikimin konkret të autorëve.
/vizionplus.tv
