Kreu i SPAK, Klodian Braho, ka kërkuar krijimin e një portofoli të posaçëm për administrimin e kriptovalutave të sekuestruara, vlera e të cilave për vitin 2025 arrin në rreth 12.4 milionë euro.
Gjatë prezantimit të veprimtarisë së SPAK gjatë vitit 2025, Braho tha se janë regjistruar tre vendime për sekuestrimin e kriptovalutave, ndërsa raste të ngjashme janë shënuar edhe në vitin 2026. Sipas tij, këto pasuri trajtohen njësoj si çdo pasuri tjetër e sekuestruar, por paraqesin vështirësi të veçanta në administrim.
Braho theksoi se deri tani është bashkëpunuar me autoritete të tjera për menaxhimin e tyre, si zgjidhje e përkohshme. Ai shtoi se po punohet për akte ligjore që do të mundësojnë një administrim më të qartë dhe efikas të këtyre aseteve.
Braho: Janë 3 vendime për sekuestrime për kriptovaluta në 2025. Ka sekuestrime edhe gjatë 2026-ës. Faza ligjore e njëjtë si për çdo pasuri. Kemi pasur problematika për administrimin e tyre. Në dijeninë time po bëhen akte ligjore për t’i administruar. Deri tani kemi bashkëpunuar me autoritete të tjera për marrjen dhe menaxhimin e administrimit të tyre, si e vetmja formë. Shpresojmë që Agjencia e Sekuestrimeve të administrojë portofolat e tyre. Pavarësisht mungesës, ka hapa pozitiv që kjo do të rregullohet së shpejti.
