Papa Françesku ka emëruar murgeshën italiane, Simona Brambilla, në krye të një prej dikastereve të Vatikanit. Brambilla u bë kështu gruaja e parë në pozicionin e prefektes në historinë e Kishës Katolike.
Zyra e shtypit e Vatikanit raportoi sot se Brambilla ishte zgjedhur për të drejtuar Dikasterin për Institutet e Jetës së Përkushtuar dhe Shoqëritë e Jetës Apostolike.
Një dikaster është i krahasueshëm me një ministri të qeverisë në shtete të tjera.
Brambilla ka shërbyer si sekretare, grada e dytë më e lartë, në të njëjtën dikaster që nga tetori 2023. Ajo ka punuar më parë si infermiere dhe misionare në Mozambik dhe ka një doktoraturë në psikologji.
Kisha Katolike ka rreth 1,4 miliardë anëtarë në mbarë botën dhe është udhëhequr nga Papa Françesku që nga marsi i vitit 2013. Kisha ka zhvilluar debate të përsëritura për një pjesëmarrje më të madhe të grave, veçanërisht për aktin e urdhërimit te grave në një fazë të mëvonshme, si priftëreshë.
Sinodi Botëror më i fundit në tetor 2023, në të cilin klerikët dhe jo klerikët debatuan për të ardhmen e Kishës, nuk solli ndonjë progres për këtë çështje.
Në pothuajse 12 vitet e tij në detyrë, papa Françesku ka emëruar dy gra në poste të larta. Në vitin 2016, ai zgjodhi historianen italiane të artit Barbara Jatta si drejtoreshë e Muzeut të Vatikanit, të cilët shërbejnë si një nga burimet më të rëndësishme të të ardhurave të shtetit.
Në vitin 2022, ai më pas emëroi motrën Raffaella Petrini si sekretare të përgjithshme të guvernatorit të Shtetit të Qytetit të Vatikanit, një rol që zakonisht mbahej nga një peshkop.
Mundësia për katolikët që nuk janë peshkopë, dhe për rrjedhojë edhe gra, për të udhëhequr një dikasteri të Vatikanit ekziston vetëm që nga viti 2022.
