I mituri që qëlloi gjashtë herë për vdekje bashkëmoshatarin e tij pak metra larg shkollës “Fan Noli” mund të dënohet maksimalisht me 17 vite burg.
Prokuroria e Tiranës ashpërsoi akuzën me të cilën ai u referua nga policia nga “vrasje me dashje” në “vrasje në rrethana të tjera cilësuese”.
“Në momentin që një i mitur nga mosha 14 deri në 18 vjeç kryen krime, e para përjashtohet nga burgimi i përjetshëm dhe e dyta merr gjysmën e maksimumit të dënimit që është 17 vite burgim”, tha avokati Arbër Hoxha.
“Po të ishte një i rritur do të shkonte përtej burgimit të përjetshëm. Sanksioni duhet të jetë i ashpër, jo vetëm për rastin konkret, pasi do ndodhin ngjarje të rënda. Mund të na ndodhë në masë, është një fenomen që duhet goditur. Është e tmerrshme të të ikë një fëmijë, nuk kam fjalë. Këtu jeta e njeriut është bërë pa vlerë. Kur ikën një fëmijë 14 vjeç më mjet prerës, është tronditëse dhe alarmante”, tha avokati Saimir Vishaj.
Avokati sqaron sesi funksionon Kodi Penal për të miturit që janë autorë të krimeve.
“Kodi Penal sanksionon që mosha për përgjegjësinë penale është 16 vjeç për kundravajtjet penale dhe 14 vjeç për krimet. Është e rëndësishme që ditën që është kryer vepra penale, personi duhet të ketë mbushur 14 vjeç, pra 14 vjeç e një ditë. Në momentin që është nën 14 vjeç nuk mban përgjegjësi penale, por sipas drejtësisë penale për të miturit, pavarësisht se nuk mban përgjegjësi penale, do të çohet në një Institut të rehabilitimit”, tha avokati Hoxha.
Megjithatë dy juristët, Saimir Vishaj dhe Arbër Hoxha nuk bien dakord për uljen e kufirit moshor për dënimin e të miturve.
“Duhen ndryshime në kodin penal. Nëse do të shohim në aspektin teorik penal Greqinë, është ulur mosha. Nëse ne e kemi 14 vjeç, mosha për përgjegjësinë penale është 12 vjeç, sepse ka evoluuar koha, aktualisht 12, 13 apo 14 vjeçarët kanë një mendje tjetër, 10 vjet apo vite të tëra, nga një brez në tjetrin, evoluon koha”, tha avokati Vishaj.
“Jo, nuk duhet ulur pragu moshor, ky është një institut tashmë 300 vjeçar, është një institute që e njeh gjithë sistemi romano-gjermanik. Por duhet bërë një punë më bindëse dhe politikat penale nuk duhet të jenë kaq të ashpra, se jo domosdoshmërisht politika penale sjell ulje të kriminalitetit”, tha avokati Hoxha.
Nëse ndaj autorit të krimit, Mario Përlleshi nëse gjykata vendos arrest në burg, atëherë ai do të shkojë në Institutin e të Miturve në Kavajë, në seksionin e paraburgimit derisa të njihet me vendimin përfundimtar./vizionplus.tv
