Ditën e sotme, Erdgys Arrazi, 31 vjeç doli para Gjykatës së Shkodrës. Kjo e fundit vendosi masën e sigurisë “arrest me burg” ndaj tij. 31-vjeçari akuzohet për dhunë në familje dhe shkaktim të vetëvrasjes, pasi bashkëshortja e tij, Alma Arrazi së bashku me tre fëmijët e mitur u hodh në lumin Buna dhe u nxorën të pajetë.
Në gjendje të rënduar, shtetasi Erdgys Arrazi deklaroi se “në këto momente nuk mund të flas sepse nuk jam në gjendje emocionale.”
Lexo edhe :
Related Posts
“Jam dakord me deklarimet e avokatit dhe mund të flas në një moment më të vonë.”
Ndërkohë avokati mbrojtës, Blerim Bazhdari kërkoi në seancën për masën e sigurisë, lirimin e shtetasit Erdgys Arrazi pasi nuk ka asnjë provë që vërteton dhunën në familje që pretendon policia dhe prokuroria apo edhe motra e viktimës.
Pala mbrojtëse paraqiti një prej recetave mjekësore të Alma Arrazit që sipas avokatit vërteton se 39-vjeçarja vuante nga probleme të shëndetit mendor.
Receta është lëshuar nga mjeku Gjon Preçi me firmën dhe vulën e tij.
Ndërkohë avokati Bazhdari i ka komunikuar pak përpara seancës shtetasit Erdgys Arrazi gjetjen e trupit të fëmijës së tretë, djalit të vogël 3 vjeçar, informacion i cili e ka rënduar psikologjikisht 31-vjeçarin.
Pala mbrojtëse tha se nuk ka asnjë provë se Erdgys Arrazi është shkaktar i vetëvrasjes të 39-vjeçares ndërsa tha se ndalimi është i paligjshëm dhe se klienti i tij duhet që të lirohet sepse nuk ka asnjë provë nga policia apo prokuroria.
Avokati mbrojtës sqaroi edhe lidhjen e pretenduar të Erdgys Arrazit duke thënë se edhe nëse ka patur kjo nuk përbën një vepër penale.
Pala mbrojtëse hodhi poshtë çdo pretendim mbi dhunën psikologjike që pretendon policia dhe prokuroria dhe se për këtë mungojnë provat.
Sipas palës mbrojtëse, Erdgys Arrazi është një prind që është kujdesur për familjen e tij dhe se ka patur një marrëdhënie normale me bashkëshorten e cila kreu aktin e rëndë të vetëvrasjes dhe mbytjes së 3 fëmijëve./vizionplus.tv
