Basha i përgjigjet Ramës: U shfaq për të mbrojtur korrupsionin që nis nga zyra e tij, nuk e do reformën zgjedhore

Kreu i Partisë Demokratike, Lulzim Basha reagoi pas deklaratave të bëra nga kryeministri Edi Rama, në një konferencë për mediat pasditen e së premtes.

Basha akuzoi kreun e qeverisë se, duke mbrojtur aferën e sterilizimit, siç u shpreh ai, po tenton që të shantazhojë drejtësinë.

Ndërsa, duke u ndalur te kriza e brendshme e PD-së, të cilën Rama nuk ngurroi ta ironizonte në daljen për media, kryetari i PD-së zyrtare tha se ajo që po ndodh në Parlament është thjesht teatër dhe “fasada e interesave të përbashkëta Rama-Berisha.”

“Sot Edi Rama u shfaq sërish për të mbrojtur korrupsionin që nis nga zyra e tij. Atë që ka bërë me Saimir Tahirin, Vangjush Dakon, Elvis Roshin e dhjetra të tjerë, sot e bëri me Ilir Beqajn. Edi Rama sot u mundua të shantazhojë drejtësinë duke marrë në mbrojtje aferën korruptive të sterilizimit, siç ka bërë edhe me inceneratorët. Një përpjekje e dëshpëruar për t’i bërë presion drejtësisë.

 

Sa i përket Reformës Zgjedhore, është tashmë e ditur se Rama është një nga njerëzit më të interesuar që të mos ketë ndryshim të sistemit zgjedhor në Shqipëri, për të mbajtur fort në këmbë marrëveshjen e 2008-ës, që u mohon shqiptarëve të drejtën për të zgjedhur deputetët që duan.

 

Edi Rama nuk e ka fshehur dhe nuk e fsheh se kë do në krye të opozitës, këtë e dëshmoi edhe sot. Por shqiptarët e kanë të qartë se teatri i Parlamentit është vetëm fasada e interesave të përbashkëta Rama-Berisha”, shkruan Basha.