Propozimi i Emannuel Macron për një “komunitet të ri politik evropian”, ka ndezur debatin, sidomos në vendet e Ballkanit Perëndimor, që presin prej vitesh dritën jeshile nga Këshilli.
Por presidenti francez sqaron se nuk planifikon të zëvendësojë procesin e zgjerimit më tepër sesa ta plotësojë atë.
EMMANUEL MACRON
PRESIDENT I FRANCES
“Komuniteti politik evropian” plotëson procesin e pranimit në Bashkimin Evropian dhe nuk është një alternativë ndaj procesit të zgjerimit të bllokut. Ideja përfaqëson një kornizë të re për strukturimin e bashkëpunimit, duke bashkuar kombet demokratike evropiane që i përmbahen grupit tonë të vlerave dhe që mund ose nuk mund të aspirojnë të anëtarësohen në Bashkimin Evropian”.
Mali i Zi është i vetmi vend në rajon që ka hapur të gjithë kapitujt e negociatave, ndërsa Serbia ka arritur progres në 22 nga 35 fushat e kërkuara. Kosovës ende nuk i është dhënë statusi i vendit kandidat dhe as liria e lëvizjes për qytetarët e saj. Ndërsa në Bosnje Hercegovinë, gjithashtu jo një kandidat zyrtar, tensionet midis politikanëve vendas vazhdojnë të kërcënojnë stabilitetin dhe të pengojnë përparimin drejt unionit.
Sakaq, Brukseli ka dështuar të nisë negociatat me Shqipërinë dhe Maqedoninë e Veriut, pasi Bullgaria refuzon të heqë veton për mosmarrëveshjet rreth historisë dhe gjuhës së përbashkët, me fqinjin e saj.
Turi rajonal i kancelarit gjerman në muajin qershor premton një ide më të qartë të planit që kanë fuqitë e mëdha të bllokut për integrimin e rajonit, i cili do të jetë në axhendën e samitit të ardhshëm të Këshillit Evropian, po në muajin qershor.
