Zhgënjimin për përgjigjen negative të Bashkimit Evropian për hapjen e negociatave për Shqipërinë dhe Maqedoninë e Veriut nuk e fsheh as analisti Sefer Selimi. Gjatë një interviste për edicionin qendror të lajmeve në “Vizion Plus”, Selimi tha se pengesat që po nxirren nuk kanë justifikim.
“U bë një sfidë që po lodh qytetarët, perspektivën evropiane të të dyja vendeve dhge ushqen euroskepticzmin dhe u jep një platformë të qëndrueshme dhe të hapur forcave të reja. Duken të pajustifikueshme të gjitha pengesat.”
Ai komentoi edhe deklaratat e dy kryeministrave Edi Rama e Zoran Zaev, duke këshilluar që nuk është mirë të kërcënohet Bashkimi Evropian.
“Ky është një reagim emocional apo i momentit. I natyrshëm për çdo politikan që e ndërton karrierën e vet mbi premtimin për të sjellë europianizmin e vendit të tij. Nuk besoj në kërcënimin ndaj Bashkimit Evropian. Kur dihet për më tepër që 26 vende të tjera lobojnë fuqishëm që kjo pengesë të kalohet dhe të nisin negociatat. Mendoj se ishte vetëm një shpërthim i momentit sepse për Ballkanin nuk ka alternativë tjetër përveç Bashkimit Evropian, që do të sjellë paqe dhe qetësi.”
