Lulzim Basha ka ftuar demokratët e Vlorës të vazhdojnë betejën për ndryshim, duke theksuar se 25 prilli ishte një masakër elektorale. Basha ka shpjeguar se zgjedhjet brenda partisë duhet të shërbejnë si një proces bashkimi për të vazhduar përballjen me qeverinë Rama.
LULZIM BASHA
KRYETAR I PD
“Në këtë rrugëtim debati i brendshëm ka vlerë, ka vlerë dhe duhet mirëpritur. Megjithatë nxitimi apo paqartësia që mund të sundojë zemrat apo mendjet e dikujt, nuk mund të kthehet në arsye për të hedhur poshtë atë që kemi ndërtuar së bashku. Historia mund të rishkruahet sa herë të duam, por nuk mund të rishkruhet në kurriz të sakrificës së demokratëve. Betejat që kemi bërë së bashku na kanë bërë më të fortë jo më të dobët. Është e lehtë të gjykosh pas kuvendit apo të bësh trimin pas lufte, e rëndësishme është të marrësh vendimet e duhura për vendin dhe të kesh kurajon t’i zbatosh siç kemi bërë gjatë këtyre 4 viteve të fundit dhe gjatë këtyre 8 viteve përballjen me këtë regjim.”
Kandidati Agron Shehaj ka zgjedhur Shkodrën për të nisur takimet me demokratët. Ai ka deklaruar se pavarësisht se pati manipulim të procesit, opozita i humbi zgjedhjet sepse nuk arriti të fitojë besimin e njerëzve dhe përgjegjës është Lulzim Basha.
AGRON SHEHAJ
KANDIDAT PER KRYETAR, PD
“Ne duhet të shohim në sy të vërtetën se shqiptarët nuk e besojnë më lidershipin e PD, duhet të pranojmë që Edi Rama është i interesuar që të mos ndryshojë lidership i PD-së sepse mund të fitojë si të dojë dhe kur të dojë. Duhet të pranojmë se për të mundur Ramën, na duhen njerëz të ndershëm dhe të fortë.”
Takimet e rivalëve të Bashës janë të vetmet ku mediat mund të marrin pjesë dhe në Shkodër demokratët kanë shfaqur kritika ndaj Shehajt e Bashës.
“A je pjese e kësaj humbjeje të PD edhe ti? Kaq doja të dija prej teje. Nëse ti je pjesë e kësaj humbjeje, atëherë çfarë kërkon. Atëherë na lër me atë humbësin se dhe ti je pjesë e tij, pra nuk ke gjë më tepër se ai ti.”
“Nëse ju e merrni përsipër lokomotivën të bëhet revolucion se ndryshe nuk ikën ky, të bëhet 2 prill në të gjithë Shqipërinë sepse ndryshe nuk ikën ky.”
Nga Durrësi kandidati Kadilli ka vënë në dukje se Lulzim Basha e ka çuar Partinë Demokratike 4 herë drejt humbjes e nuk meriton më të drejtojë opozitën
FATBARDH KADILLI
KANDIDAT PER KRYETAR, PD
“Ka dështuar me rrugë radikale, ka dështuar me rrugë negociatore. E humb me radikalizëm e humb dhe në tavolinë, i ndërrohet sistemi në tavolinë si ti dojë qejfi kundërshtarit tonë. Mos presë ndonjë nga ju që pas 4 vjetësh Rama të heqë dorë vetë. Vërtet ajo Rama ik është Rama të lutem ik, edhe Zaho nuk ka për të ikur po vazhdoi kështu. Rama largohet. Dhe unë miqtë e mi kam një mesazh sot, Rama largohet, e mundim ne.”
Sipas Kadillit, PD duhet të ndryshojë duke siguruar lidership të ri e më shumë demokraci të brendshme për t’u bërë alternativë fituese në zgjedhje.
