Kryeministri Edi Rama deklaroi prerë se vendimi për ndryshimet kushtetuese i takon vetëm Parlamentit të Shqipërisë.
Duke folur nga foltorja e Kuvendit, Rama tha se nuk u takon ambasadorëve të vendeve partnere të marrin përgjegjësi për këtë çështje.
Ai i falenderoi për kontributin e dhënë, por u shpreh i pakënaqur për faktin që sa herë ka një problem politik, kthehet koka tek diplomatët.
“Falenderoj edhe miqtë dhe partnerët që janë përfshirë në këtë proces. I takon shtetit shqiptar të vendosë përmes parlamentit teë vet se çfarë bën me sistemin zgjedhor. Nuk është një zgjedhje qe kemi detyrimin ta ndajmë me ambasadoren amerikane dhe me asnjë ambasador tjetër, duke i respektuar maksimalisht. E them këtë sepse u bënë 30 vjet dhe nuk mund të bëhen edhe 30 vjet të tjera nëse ne vazhdojmë të mos i themi gjërat siç janë. Nuk është përgjegjësia e ambasadores amerikane, e BE, e Uashingtonit, e Berlinit apo e Parisit që ne prej 30 vjetësh kërkojmë në anglisht zgjidhjen e problemeve tona, zgjidhjen e problemeve që i krijojmë vetë. Kur dëgjoj ambasadoren amerikane që thotë do të ndjekim me vëmendje drejtuesit politikë a do të mbajnë apo jo fjalën, nuk më vjen mirë. Kjo votë sot është votë me dinjitet, është vendimmarrja jonë, tërësisht e përputhur me standardet ndërkombëtare.”
Sipas kreut të qeverisë, kush nuk voton pro ndryshimeve kushtetuese për hapjen e listave, do të thotë se nuk është në krah të popullit dhe se nuk e meriton besimin e tij.
“Një debat i madh, por që rrallëherë e bën këtë Parlament një trup të bashkuar me disa përjashtime, në anën e duhur të historisë dhe të popullit shqiptar. Sot, vota e përbashkët është në fakt të qenit të bashku në anën e duhur të historisë, të zhvillimit demokratik dhe në anën e duhur të popullit shqiptar, të cilëve do t’u japim mundësinë të zgjedhin jo vetëm partinë, por edhe deputetin që duan. Të dalësh kundër kësaj, do të thotë të jesh në anën e gabuar të historisë, të mos kesh besim tek populli yt dhe të tregosh që nuk e meriton besimin e tij. Ne sot përmbyllim një fazë jo të lehtë të një reforme që falë këtij Parlamenti u bë reformë, falenderoj të gjithë deputetët për kontributin e dhënë për të sjellë këtë ditë votimi këtu në Parlament.”
