Këngëtarja e njohur shqiptare, Kida, ka kurorëzuar dashurinë me partnerin e saj, Ajbin, në një ceremoni madhështore të zhvilluar në Romë. Çifti zgjodhi kryeqytetin italian për të shënuar një nga ditët më të rëndësishme të jetës së tyre, në prani të familjarëve, miqve dhe emrave të njohur të muzikës shqiptare e kosovare.
Ceremonia u mbajt në “Villa Miani”, një rezidencë historike e vendosur në Monte Mario, e njohur për pamjen panoramike mbi Romën. Dekori elegant, ambienti luksoz dhe atmosfera romantike i dhanë eventit një tjetër dimension, duke e kthyer dasmën në një festë të veçantë për çiftin dhe të ftuarit.
Vëmendjen kryesore e mori padyshim nusja. Kida u shfaq gjatë mbrëmjes me disa fustane nusërie, duke ndryshuar edhe stilin e flokëve. Çdo paraqitje e saj u shoqërua me komente dhe vëmendje të madhe nga të ftuarit dhe ndjekësit në rrjetet sociale.
Atmosfera u ndez edhe më shumë nga prania e shumë artistëve të njohur nga Shqipëria dhe Kosova. Jonida Maliqi, Ylli Limani, Dafina Zeqiri, Shkurte Gashi dhe Ermal Fejzullahu ishin vetëm disa prej emrave që iu bashkuan festës, duke e shndërruar mbrëmjen në një spektakël të vërtetë muzikor.
Me Romën si sfond dhe mes njerëzve të tyre më të afërt, Kida dhe Ajbi nisën kështu një kapitull të ri në jetën e tyre. Ceremonia, e kuruar në çdo detaj, u kthye në një nga eventet më të komentuara të kësaj vere në showbiz-in shqiptar.
/vizionplus.tv
