Lumir Abdixhiku është rikonfirmuar në krye të Lidhjes Demokratike të Kosovës (LDK), pasi i mbijetoi nismës për shkarkimin e tij gjatë Kuvendit të jashtëzakonshëm të partisë, të mbajtur këtë të enjte.
Në Kuvend morën pjesë 328 nga 355 delegatë me të drejtë vote, të cilët u thirrën për të vendosur nëse Abdixhiku do të vazhdonte të drejtonte partinë apo do të largohej nga posti i kryetarit.
Procesi i votimit u zhvillua pas kërkesës së një grupi delegatësh për rishikimin e udhëheqjes së LDK-së, duke e kthyer mbledhjen në një test të rëndësishëm për drejtimin e partisë.
Në përfundim të votimit, Abdixhiku mori besimin e delegatëve dhe u rikonfirmua në detyrë, duke i mbijetuar nismës për shkarkimin e tij.
Lumir Abdixhiku është kryetari i katërt në historinë e Lidhjes Demokratike të Kosovës, partisë më të vjetër politike në vend.
Në fjalën hyrëse në këtë kuvend, Abdixhiku e cilësoi “të gabuar, të pavend dhe të pakohë” nismën për shkarkimin e tij.
“E konsideroj të gabuar, vjen në mënyrë të njënashme, në një kohë të ndjeshme për vendin dhe kohë përcaktuese për partinë tonë”, tha ai.
Sipas tij, nga ky kuvend që për qëllim rrëzimin e kreut partiak, LDK-ja nuk del më e fortë, më e organizuar e as më e bashkuar. Ai argumentoi se brenda pak muajsh ishte paraparë që të mbahej procesi i rregullt zgjedhor në parti, duke thënë se nuk do të kishte nevojë për rrëzim, por për zgjedhjen e udhëheqjes së re.
Abdixhiku tha se ky kuvend po mbahet në periudhën kur Kosova po përballet me një prej krizave më të mëdha institucionale në dekadat e fundit, dhe sipas tij, “zgjedhjet e reja që na rrinë mbi qafë sërish”. Ai kujtoi se më 31 janar kishte fituar votëbesimin e partisë për të vazhduar udhëheqjen, ndonëse theksoi se kuvendi atëbotë ishte thirrur pasi partia kishte shënuar rezultat më të keq në zgjedhjet e shkurtit, sesa shënoi në qershor.
“Me cilën logjikë vazhdohet me rezultat më të keq, e rrëzohet me rezultat më të mirë”, tha Abdixhiku.
Sipas tij, përgjegjësinë për punën i jep aktivistëve që u angazhuan gjatë fushatës zgjedhore dhe që e mbrojtën partinë, e jo atyre, që sipas Abdixhikut, refuzuan të merrnin pjesë në organet e partisë e në betejat politike.
Abdixhiku tha se së voni delegatët janë përballur me presione dhe kërcënime për nënshkrimet për nismën kundër tij, duke argumentuar se kjo nuk është mendësia rugoviane.
“Unë sot e vendosi fatin tim në duart tuaj, edhe njëherë. Ju, ju lutem vendoseni fatin e Kosovës dhe LDK-së, mbi fatin tim”, tha Abdixhiku, duke shtuar se do të pranojë rezultatin e këtij kuvendi.
Abdixhiku e thirri këtë kuvend të jashtëzakonshëm më 27 korrik, pasi qindra delegatë dorëzuan nismën për shkarkimin e tij, pas pakënaqësive me rezultatin e zgjedhjeve të qershorit, ku LDK-ja doli fuqia e tretë politike me 18 deputetë, në Kuvendin me 120 mandate.
