Kreu i Partisë Demokratike, Sali Berisha, në një bashkëbisedim online me qytetarët ka bërë thirrje për pjesëmarrje në protestën e organizuar në Tiranë, duke u kërkuar demokratëve dhe qytetarëve që të angazhohen për mbarëvajtjen dhe suksesin e saj.
Berisha vlerësoi protestën qytetare në bulevardin e Tiranës, e cila vijon tashmë prej 49 ditësh, duke e cilësuar atë një lëvizje të rëndësishme dhe duke akuzuar qeverinë e kryeministrit Edi Rama për presione ndaj pjesëmarrësve.
“Gjatë kësaj jave vazhdoi me heroizëm epik protesta rinore qytetare në bulevardin e Tiranës, pavarësisht nga terrori qeveritar i Edi Ramës dhe falangave të tij të krimit ndaj eksponentëve të kësaj proteste dhe pjesëmarrësve të saj”, u shpreh Berisha.
Ai tha se protesta paqësore e të rinjve dhe qytetarëve shqiptarë ka vijuar dhe ka marrë mbështetje ndërkombëtare.
“Duke shprehur edhe njëherë mbështetjen më të fuqishme për këtë lëvizje, për këtë protestë të paprecedent që nga vitet ’90 në historinë e Shqipërisë, ftoj çdo demokrate e demokrat të marrin pjesë në frymën e saj si qytetarë, të bëjnë gjithçka për suksesin e saj”, deklaroi Berisha.
