Zëvendëskryeministrja Albana Koçiu deklaroi se procesi i integrimit europian të Shqipërisë po vijon pa pengesa, ndërsa theksoi se qeveria shqiptare ka përmbushur me seriozitet të gjitha detyrimet ndaj Bashkimit Europian.
Në një deklaratë për mediat pas mbledhjes së qeverisë, Koçiu u shpreh se institucionet shqiptare dhe shumica parlamentare kanë mbajtur një qasje konstruktive në funksion të avancimit të procesit të integrimit.
“Qeveria shqiptare, institucionet dhe PS në Kuvend kanë dialoguar në një qasje konstruktive dhe gjithë vendimmarrjet nuk e kanë cënuar progresin e integrimit. Të gjitha këto janë aludime të opozitës, të cilat nuk ia dolën të ndikojnë në këtë proces. Në fund të ditës ne bëjmë detyrat me përkushtim dhe shumë seriozitet dhe për këtë BE na njeh progresin”, deklaroi Koçiu.
Ajo theksoi se vlerësimet pozitive nga Bashkimi Europian janë tregues i progresit të bërë nga Shqipëria në rrugën drejt anëtarësimit.
Koçiu bëri të ditur se qeveria pret përfundimin e Konferencës së 8-të Ndërqeveritare dhe rekomandimet për kushtet përmbyllëse, ndërsa synimi mbetet hapja e diskutimeve për 10 kapituj brenda këtij viti.
“Ne jemi duke punuar, presim me përfundimin e Konferencës së 8-të Ndërqeveritare, jemi duke pritur rekomandimet për kushtet përmbyllëse dhe aspirata është që brenda këtij viti të kemi filluar diskutimet për 10 kapituj. Duhet të ulemi në tryezë me palën europiane për të diskutuar një nga një gjithë detyrat dhe rekomandimet”, tha Koçiu.”, shtoi ajo.
Në përfundim, zv/kryeministrja akuzoi opozitën për sulme politike dhe tentativa për të zbehur punën e bërë në kuadër të integrimit europian, duke theksuar se këto përpjekje nuk do të ndikojnë në rrugën europiane të Shqipërisë.
/vizionplus.tv





