Bashkimi Evropian po shqyrton mundësinë e rifillimit të kontakteve me Rusinë, në një kohë kur vëmendja e Shteteve të Bashkuara është përqendruar në Lindjen e Mesme, ndërsa lufta në Ukrainë vazhdon pa një zgjidhje të afërt.
Çështja është në fokus të takimit dyditor të ministrave të jashtëm të vendeve anëtare të BE-së, që po zhvillohet në Qipro. Aty do të diskutohet jo vetëm dialogu i mundshëm me Rusinë, por edhe mënyra se si Evropa do të përfaqësohet në çdo proces negociues.
“Para se të flasim me rusët, së pari duhet të biem dakord midis nesh për çështjet për të cilat duam të flasim me ta”, deklaroi Kaja Kallas, përfaqësuese e lartë e BE-së.
Shefja e diplomacisë së Unionit paralajmëroi gjithashtu që Bashkimi Evropian të mos përfshihet në debate që, sipas saj, i shërbejnë strategjisë së Kremlinit.
“Unë besoj se ky është një kurth në të cilin Rusia dëshiron që ne të biem: të diskutojmë se kush do të flasë me ta në një kohë kur ata tashmë po zgjedhin se kush është i përshtatshëm dhe kush jo. Le të mos biem në këtë kurth. Negociatat janë gjithmonë një përpjekje ekipore”, tha Kallas.
Zërat për një dialog të mundshëm me Moskën janë shtuar pas ngecjes së përpjekjeve ndërmjetësuese nga Shtetet e Bashkuara dhe zhvendosjes së fokusit të administratës Trump drejt Lindjes së Mesme.
Ndërkohë, presidenti ukrainas Volodymyr Zelensky ka kërkuar që Evropa të marrë një rol më aktiv në procesin diplomatik, duke theksuar rëndësinë e përfshirjes së drejtpërdrejtë të vendeve evropiane në çdo negociatë për përfundimin e luftës.
