Përplasja mes mazhorancës e opozitës nuk mungoi as këte herë në Komisionin e Posaçëm të Reformës Territoriale. Fokusi nuk ishte tek ndarja e hartës së bashkive por tek mënyra e mbajtjes së mbledhjes.
Ishte opozita ajo që pas disa minutash pushim u rikthye me akuza se socialistët marrin vendime pa pëlqimin e tyre.
“Ne e kuptojmë se ju jeni në mazhorancë dhe pretendoni se mund të merrni vendime edhe për ne. Por kjo mbledhje është e bashkëkryesuar dhe ju kurrsesi nuk mund të na hiqni as të drejtën e pyetjeve as të drejtën e vendimeve. Ne kërkuam pushim pasi po merrnin një vendim si grup dhe ju nisët mbledhjen pa miratimin tonë. Kjo mbledhje nuk mund të zhvillohet pa kuorum”, tha Luçiano Boçi.
Por edhe mazhoranca nuk ishte e kënaqur pasi ishte vetë bashkëkryetari socialist, Arbjan Mazniku pretendoi se anëtarëve të majtë nuk i jepet hapësirë.
“Keni dy orë që nuk i jepni fjalën një personi të maxhorancës. Ju pretendoni se ne marrin vendime pa pëlqimin tuaj por është e kundërta. Jemi treguar gjithmonë bashkëpunues me ju”, tha Arbjan Mazniku.
Debatet mes socialistëve dhe demokratëve janë berë edhe më të forta.
Mazniku: Nuk mund të vazhdojë kjo histori.
Boçi: Nuk bëhet kjo sfidë në këtë formë se jemi edhe live. Në komision nuk pranoj sfida të tilla. Parashtrimin tim nuk dua të ma ndërpresë kush, asnjë deputeti s’mund t’ja ndërpresim edhe ne dhe jo më të ndërhyjmë ne si bashkëdrejtues. Këtu stop orkestra.
Mazniku: Jepni fjalën.
Boci: Mos bëj si kalama, ta mbaroj. Ça është kjo ndërhyrje.
Më herët, kryetarët e bashkive të ftuar për një dëgjesë gjatë komisionit sollën dhe shqetësimet e tyre sa i përket institucioneve që ata drejtojnë, duke theksuar se nevojiten më tepër fonde si dhe shtimi i burimeve njerëzore në mënyrë që qytetarët të marrin shërbime cilësore.
